Luk 24 | NdeIBE | STEP | Ngosuku lokuqala lweviki, ekuseni kakhulu abesifazana bathatha amagcobo ababewalungisile baya ethuneni.

Luke 24

Ukuvuka KukaJesu

1 Ngosuku lokuqala lweviki, ekuseni kakhulu abesifazana bathatha amagcobo ababewalungisile baya ethuneni. 2 Bafumana ilitshe ligiqiwe lasuswa ethuneni, 3 kodwa kwathi ngokungena kabaze basifumana isidumbu sikaJesu iNkosi. 4 Bathi belokhu besathithibele ngakho, masinyane kwema eduze labo amadoda amabili egqoke izigqoko ezibenyezela njengombane. 5 Bethuka abesifazana bathi mbo phansi ngobuso, kodwa amadoda lawo athi kubo, “Lidingelani ophilayo kwabafileyo na? 6 Kakho lapha; usevukile! Khumbulani ukuthi walitshela njani eseselani eGalile wathi: 7 ‘INdodana yoMuntu kumele inikelwe ezandleni zabantu abayizoni, ibethelwe esiphambanweni kuthi ngosuku lwesithathu ivuswe njalo.’ ” 8 Base bewakhumbula amazwi akhe.

9 Kwathi sebebuyile bevela ethuneni, zonke lezi izinto bazibikela abaliTshumi lanye labanye njalo. 10 KwakunguMariya Magadalena, loJowana, loMariya unina kaJakhobe labanye ababelabo abatshela abaphostoli ngalokhu. 11 Kodwa kababakholwanga abesifazana laba, ngokuba amazwi abo ayengathi yikuwumana kubo.

12 Kodwa uPhethro wasukuma wagijimela ethuneni. Walunguza wabona amalembu elineni ethe qekele wodwa, wasebuyela emangele ukuthi kambe kwakwenzenjani.

Endleleni Eya E-Emawusi

13 Kwathi ngalonalelolanga ababili babo babehamba besiya emzini owawuthiwa yi-Emawusi, ungaba ngamakhilomitha alitshumi lanye kusuka eJerusalema. 14 Babekhulumisana ngakho konke okwakwenzakele. 15 Bathi belokhu bekhuluma bebonisana ngazo izinto lezi, uJesu yena ngokwakhe wabaxhuma wasehambisana labo; 16 kodwa izingqondo zabo zalala abaze bamnanzelela ukuthi ungubani.

17 Wababuza wathi, “Likhuluma ngani kanti lilokhu liphakathi kohambo lwenu?” Bema mpo, ubuso babo bubunile. 18 Omunye wabo owayethiwa nguKlewophasi wambuza wathi, “Kanti wena uyisihambi yini eJerusalema ukhanya ungazazi izinto ezenzakele khona kuzona lezi izinsuku?”

19 Wabuza wathi, “Yizinto bani na?” Baphendula bathi, “ZingoJesu waseNazaretha. Wayengumphrofethi; elomfutho ngokukhuluma langezenzo phambi kukaNkulunkulu lasebantwini bonke. 20 Abaphristi abakhulu lababusi bethu bamnikela ukuba agwetshelwe ukufa, yikho bambethela; 21 kodwa thina sasithembe ukuthi wayenguye owayezahlenga u-Israyeli. Futhi okunye yikuthi sekulusuku lwesithathu kulokhu kwenzakala konke lokhu. 22 Phezu kwalokhu, abanye besifazana bethu basimangalisile. Bahambile ethuneni ekuseni kakhulu lamuhla, 23 kodwa kabasifumananga isidumbu sakhe. Babuyile bazasitshela ukuthi babone umbono wezingilosi ezithe uyaphila.

24 Kwasekusithi abanye babakhula bethu baya ethuneni bafumana kunjengokuba abesifazana betshilo, kodwa yena kabamfumananga.”

25 Wathi kubo, “Uthi liyizithutha ezinjani, njalo lilezinhliziyo ezithundubeleyo ekukholweni konke lokho okwakhulunywa ngabaphrofethi!

26 UKhristu wayengamelanga ahlupheke yini zonke lezi izinto anduba angene ebukhosini bakhe na?” 27 Wasesukela kuMosi kanye labaPhrofethi bonke wabachazela okwatshiwo emiBhalweni mayelana laye.

28 Bathi sebebanga emzini lowo ababesiya kuwo uJesu wenza ingathi wayesedlula. 29 Kodwa bamncenga kakhulu bathi, “Hlala lathi ngokuba sekusihlwa; usuku luphose selwedlule.” Wasengena ukuthi ayohlala labo.

30 Wathi esehlezi labo etafuleni wathatha isinkwa wabonga, wasesihlephula wasebakhangeza. 31 Kwathi dlwe emehlweni abo, bamazi, yena wasenyamalala kubo 32 Babuzana bathi, “Konje izinhliziyo zethu bezingatshiseki yini lapho ekade ekhuluma lathi endleleni esivulela iMibhalo na?”

33 Bahle bathi lothu masinyane babuyela eJerusalema. Khonale bafumana abaliTshumi lanye kanye lalabo ababelabo bebuthene ndawonye 34 besithi, “Kuliqiniso! INkosi isivukile yabonakala kuSimoni.” 35 Kwathi labo ababili balandisa ngalokho okwakwenzakele endleleni, lokuthi uJesu bamnanzelela njani lapho aze ahlephule isinkwa.

UJesu ubonakala kubaFundi

36 Bathi belokhu besakhuluma ngakho lokhu, uJesu yena ngokwakhe wema phakathi kwabo wathi, “Ukuthula kakube kini.”

37 Bethuka besaba, bekhumbula ukuthi babebona ithonga 38 Wathi kubo, “Kungani lihluphekile, njalo kungani kulokuthandabuza ezingqondweni zenu na? 39 Khangelani izandla zami lezinyawo zami. Yimi mina ngokwami! Ngithintani libone; ithonga kalilanyama lamathambo njengoba libona ukuthi mina ngilakho.”

40 Esetshilo lokhu wabatshengisa izandla lezinyawo zakhe. 41 Kwathi belokhu bengakholwa ngenxa yokuthaba lokumangala wababuza wathi, “Kungabe lilakho loba yini okokudla lapha na?”

42 Bamupha iqatha lenhlanzi exatshiweyo,

43 wayithatha wayidla phambi kwabo.

44 Wathi kubo, “Lokhu yikho engalitshela khona ngiselani ukuthi: Konke kumele kugcwaliseke okwalotshwa ngami eMthethweni kaMosi labaPhrofethi lamaHubo.”

45 Wasebavula izingqondo zabo ukuze bakwazi ukuzwisisa iMibhalo.

46 Wabatshela wathi, “Nanku okulotshiweyo: UKhristu uzahlupheka aphinde avuke kwabafileyo ngosuku lobuthathu, 47 njalo ukuphenduka lokuthethelelwa kwezono kuzatshunyayelwa ebizweni lakhe ezizweni zonke, kuqaliswa eJerusalema. 48 Lingofakazi balezizinto.

49 Ngizalithumezela lokho uBaba akuthembisileyo; kodwa libohlala edolobheni lize lembathiswe amandla avela phezulu.”

Ukwenyukela Ezulwini

50 Kwathi esebakhokhele waya labo eduze leBhethani waphakamisa izandla zakhe wababusisa. 51 Elokhu esababusisa wasuka kubo wenyuselwa ezulwini. 52 Base bemkhonza, babuyela eJerusalema bethokoza kakhulu.

53 Bahlala kokuphela ethempelini bedumisa uNkulunkulu.